thebr24news
કોમર્સ ફેકલ્ટી ખાતે ધુળેટી પર્વની હર્ષોલ્લાસભેર ઉજવણી
સંસ્કારી નગરીની શાન ગણાતી મહારાજા સયાજીરાવ યુનિવર્સિટીની કોમર્સ ફેકલ્ટી આજે રંગોના મહેરામણમાં ડૂબેલી જોવા મળી હતી. હોળીના પવિત્ર પર્વ બાદ આજે ધુળેટી પર્વ ફેકલ્ટીના પ્રાંગણમાં વિદ્યાર્થીઓએ ભારે ઉત્સાહ અને ઉમંગ સાથે એકબીજાને ગુલાલથી રંગીને પર્વની શુભેચ્છા પાઠવી હતી.સવારથી જ ફેકલ્ટીના મેદાનમાં વિદ્યાર્થીઓનું ટોળું એકત્રિત થવા લાગ્યું હતું. ‘હોલી હૈ’ ના નાદ અને ડીજેના તાલે યુવાધન હિલોળે ચઢ્યું હતું. કોમર્સના વિદ્યાર્થીઓએ માત્ર રંગોથી જ નહીં, પરંતુ ભાઈચારા અને એકતાના રંગે પણ એકબીજાને રંગ્યા હતા.કેમિકલયુક્ત રંગોને બદલે મૈત્રીપૂર્ણ ગુલાલ અને અબીલથી વિદ્યાર્થીઓ રમતા નજરે પડ્યા હતા.સિનિયર અને જુનિયર વિદ્યાર્થીઓએ સાથે મળીને ધુળેટી રમી, જે ફેકલ્ટીની જીવંત સંસ્કૃતિનું પ્રદર્શન કરતું હતું.
અભ્યાસના વ્યસ્ત શિડ્યુલ અને પરીક્ષાઓની દોડધામ વચ્ચે ધુળેટીનો આ ઉત્સવ વિદ્યાર્થીઓ માટે માનસિક તાજગી લાવનારો સાબિત થયો હતો. ફેકલ્ટીના ખૂણે ખૂણે રંગબેરંગી ચહેરાઓ અને હસતા ચહેરાઓ જોવા મળતા હતા. વિદ્યાર્થીઓએ આ પળે સેલ્ફી અને ગ્રુપ ફોટોગ્રાફ્સ લઈને સોશિયલ મીડિયા પર પણ ધુળેટીના રંગો વિખેર્યા હતા.
